Fundargerð 8. fundar 2005, 19. desember

 

Viðstödd voru þau Þorsteinn Gunnarsson formaður nefndarinnar, Pétur H. Ármannsson, Nikulás Úlfar Másson, Einar Njálsson, Margrét Hallgrímsdóttir, Guðmundur Þór Guðmundsson og Magnús Skúlason sem ritaði fundargerð.

 

1.  Fundargerð síðasta fundar frá 4. nóvember s.l. Samþykkt með breytingum.

 

2.  Mál sem forstöðumaður hefur afgreitt á milli funda Húsafriðunarnefndar:

 

a.  Þingholtsstræti 17, Reykjavík (1882).  Geymslur undir lóð. 

 

b.  Hafnargata 9, Sæmundarpakkhús, Stykkishólmi (1899).  Breyting á nýtingu.   

 

c.  Austurgata 25, Hafnarfirði (1928).  Viðbygging á norðausturhlið. 

 

d.  Linnetsstígur 9 A, Hafnarfirði (1915).  Niðurrif. 

 

e.  Njálsgata 33 B, Reykjavík (1912).  Hækkun á risi, breytingar á ytra borði. 

 

f.  Hverfisgata 18, Reykjavík (1906).  Aðgengi hreyfihamlaðra, verönd og aðkoma. 

 

g.  Hafnarstræti 21, Ziemsenshús Reykjavík (1883, 1899,1911).  Niðurrif. 

 

h.  Reitur 1.180.0 skj. nr. 7153.  Tillaga að deiliskipulagi MR-reits. 

 

i.   Kaupvangsstræti 6, Akureyri (1928, 1929, 1949).  Varðveislugildi. 

 

j.   Bergstaðastræti 1, Reykjavík (1906).  Breytingar á ytra borði framhliðar.  

 

k.  Breiðargata 18, Bræðrapartur á Akranesi (1908).  Flutningur og breytingar á húsi. 

 

l.   Íbúðarhúsið Hagi í Hagalandi, Árborg (1910).  Umsögn.  

 

m. Endurskoðun á aðalskipulagi Akureyrar.  Miðbærinn.

 

n.  Gamli prestbústaðurinn í Laufási, Grýtubakkahreppi (1936).  Viðbygging. 

 

Nefndin staðfesti ofangreindar afgreiðslur.

3.  Húsasafn Þjóðminjasafns. Samvinna Húsafriðunarnefndar og Þjóðminjasafns um varðveislu húsa í safninu. 

Sagt var frá fundi starfshóps Hfrn. og Þjms. þar sem Hrefna Róbertsdóttir mætti fyrir hönd safnsins.

Það er áfram sameiginlegt álit allra að framkvæmdaþátturinn verði hjá Húsafriðunarnefnd en rannsóknarþátturinn hjá Þjóðminjasafni.

Rekstur húsanna yrði í höndum Þjms, byggðasafna eða annarra aðila. Í sumum tilvika yrði um forvörsluverkefni að ræða sem yrðu á hendi Þjms.

Við upphaf verkefnisins yrði stofnað til málstofu þar sem saman kæmu starfsmenn frá Hfrn. og Þjms. þ.á.m. forverðir. Formaður lagði til að við upphaf samvinnunnar yrði ráðist í verkefni sem eftir yrði tekið t.d að ljúka viðgerðum á Keldum. Þá lagði hann einnig til að ráðist yrði hið fyrsta í útgáfu leiðbeiningarits um torf- og steinhleðslur í ritröð Hfrn.

Fjárveitingar til Húsasafnsins í ár eru 70 millj. króna. Að auki eru á næstu árum 60 millj. til viðgerða og endurbygginga að Núpsstað.

Forstöðumaður lagði til að ráðin yrði húsasmíðameistari með sérþekkingu til að sinna áætlunargerð og umsjón með vinnu við Húsasafnið. Hann mundi einnig nýtast vel við eftirlit og ráðgjafarstörf við hús eða mannvirki sem hlotið hafa styrk úr Húsafriðunarsjóði.

Samþykkt var að vinnuhópur héldi áfram störfum.

 

4.  Skráningarmál Húsafriðunarnefndar.

Forstöðumaður lagði fram minnisblað um málið.

Þjóðminjavörður lagði til að skráning úr húsakönnunum í Sarp færi fram í fjarvinnslu.

Nefndin vill að áhersla sé lögð á að ljúka gerð styrkjaskrár.

Forstöðumaður sagði frá því að öll skráningarmál hefðu tafist vegna þess að skráning í Sarp II hefði ekki gengið sem skyldi. Við úthlutun ársins 2006 yrði þessi skrá ekki tiltæk en lofaði hins vegar að við úthlutanir árið 2007 yrði hún til reiðu.

Samþykkt var að skráning á friðuðum húsum og húsum sem hafa hlotið styrk úr húsafriðunarsjóði verði gerð af starfsmanni nefndarinnar en skráning á öðrum húsum sem hafa varðveislugildi 1-4(5) verði unnin í fjarvinnslu.

 

5.  Árangurstjórnarsamningur.

Lögð voru fram lokadrög að árangursstjórnarsamningi milli Menntamálaráðuneytis og Húsafriðunarnefndar, en það er ákvörðun ráðuneytisins að gera slíka samninga við menningarstofnanir sínar. Sagt var frá fundi ráðuneytisfólks með forstöðumanni og formanni Hfrn. þann 6. desember sl. þar sem farið var yfir drög að samningi og þar sem stefnumörkun nefndarinnar frá 2002 var höfð til hliðsjónar. 

Þjóðminjavörður kom með ábendingar um að það væri skylda ráðuneytisins að kynna allar laga- og reglugerðarbreytingar fyrir Hfrn. og ætti það að komast inn í samninginn.

 

6. Gamla Gúttó í Hafnarfirði

Formaður rakti samskipti og áhuga Jóns Viðars Jónssonar á málinu en hann hafði upphaflega áhuga á að fá húsið undir leikminjasafn. Þá var lagt fram álit Karls Þórssonar minjavarðar í Hafnarfirði sem telur jafnvel að varðveislugildi hússins skv. Save kerfi geti verið allt að 2-3. Salurinn, sem byggður var 1886 af Magnúsi Th.S. Blöndahl, er elsti  samkomusalur góðtemplara á landinu og var lengi helsti samkomusalur Hafnfirðinga. Umræður urðu um varðveislugildi hússins, hversu einstakt  það væri og hvort ástæða væri til friðunar þess. Málinu var síðan frestað og ákveðið að bíða niðurstöðu húsakönnunar sem er að fara af stað.

 

7. Önnur mál

a. Kirkjur Íslands

Formaður sagði frá opnun sýningar á Sauðárkróki á veggspjöldum með myndum úr bókum um kirkjur í Skagafirði.

 

b. Forstöðumaður sagði frá úthlutunum Fjárlaganefndar sem ákveðnar voru í samráði við hann. Samtals er um viðbót að ræða við Húsafriðunarsjóð um126 millj. kr. ætlað til 49 verkefna.

 

c.  Friðun 20. aldar bygginga

Lagðar fram fyrstu hugmyndir Péturs Ármannssonar en frekari kynningu frestað.

Pétur var ennfremur beðinn um að gera frekari tillögur að steinsteypuklassík frá 1918- 1940. Hann er með það til skoðunar.

 

d. Hafnarfjarðarkirkja. Jarðhús.

Lagðar fram teikningar Þorsteins Gunnarssonar arkitekts dagsettar í desember 2005.

Erindið var samþykkt. Við afgreiðslu þess vék Þorsteinn af fundi.

 

e.  Tómasarhagi 31. Hús Gísla Halldórssonar arkitekts.

Formaður sagði frá heimsókn meirihluta nefndarinnar ásam forstöðumanni til Gísla þar sem húsið var skoðað í fylgd höfundar, sonar, sonardóttur og sonardótturdóttur.

Var það mál manna eftir heimsóknina að húsið væri verðugt höfundarverk sem bæri að friða.

 

f.  Verk Guðjóns Samúelssonar.

Pétur Ármannsson  afhenti nefndinni myndskreytta skrá sem hann hefur gert yfir verk Guðjóns.

 

g. Hafnarstræti 21, Ziemsenshús, Reykjavík.

Gerð grein fyrir vinnufundi með Sigurði Einarssyni, verkefnisstjóra Portus group, hinn 23. nóvember 2005 og svohljóðandi bókun nefndarinnar:

 

Húsið Hafnarstræti 21 er eitt af elstu húsum í Reykjavík og ómissandi hluti af merkilegri heild gamalla og friðaðra húsa austanvert við Hafnarstræti þar sem form götunnar geymir minningu um forna strandlínu Reykjavíkur. Húsið er hið eina sem eftir stendur af verslanatorfu Thomsens magasíns og ásamt bryggjuhúsinu (Vesturgötu 2) síðasta húsið sem stendur eftir af eldri byggð á hafnarbakkanum, í kjallara hússins eru mannvirki sem tengdust hafnarstarfsemi fyrri tíðar.

Húsafriðunarnefnd ítrekar álit sitt frá 29. janúar 2001 og mælist til að húsið verði varðveitt á sínum stað.

Magnús Skúlason